Xalq şairi Vahid Əziz təbiəti qorumağa səsləyir

Xalq şairi Vahid Əziz təbiəti qorumağa səsləyir
Bakı Şəhər Mədəniyyət Baş İdarəsi Yasamal rayon MKS-nin M.Ş.Vazeh adına Mərkəzi Kitabxanasında “Yaşıl dünya naminə həmrəylik ili” ilə əlaqədar kitabxanada həyata keçirilən “Təbiətə valeh olanlar” layihəsi çərçivəsində xalq şairi Vahid Əzizin yeni şeiri oxuculara təqdim olunur.

“Bakının göy qurşağı” şeirində şair təbiətin dəyişdiyini, dənizin əvvəlkitək coşub-çağlamadığını, arabir yağış yağsa da, göy qurşağının “Qurşaq” bağlamadığını təəssüf hissiylə qələmə alır. Küləklərə “tıxac” yaradan nizamsız tikilən göydələnlərin paytaxtın yerdə simasını, göydə “Göy qurşağını” itirdiyinini, ekoloji balansın pozulduğunu ürək yanğısı ilə oxuculara çatdırır. Müəllif təbiəti, gözəllikləri qorumağın vacibliyini vurğulayır.

VAHİD ƏZİZ

BAKININ “GÖY QURŞAĞI”

Fərqlilik azalır yayla-baharda,

Dəniz də həvəslə coşub-çağlamır,

Bakıda arabir yağış yağsa da,

Göylər əzəlkitək «Qurşaq» bağlamır.

Dəymir gözlərimə qağayılar da,

Yaxında, uzaqda görünmür daha,

Sanki səmalarda bəyaz işıq da

Sınıb yeddi rəngə bölünmür daha.

Elə pozulub ki, gözəl görkəmi

Bəzən tanımıram «hara-haradır?»,

Nizamsız tikilən «göydələnləri»

Hətta küləklərə «tıxac» yaradır,

Gözümdə həsrətim, qəlbimdə yanğı

Qaytarın Paytaxtın yaraşığını!

Yerdə simasını itirən Bakı

Göylərdə itirdi «Göy qurşağını».
Tarix: 14-06-2024, 12:07
14.06.2024
11:28
Milli Qurtuluş Günü